Burisrawa kaedanan - 6

Ti bah AA

 

 

Teu sabaraha lami ti harita 3 amban lalebet ka Taman Sari; margi Sang Sudewi teu aya soantenna sama sakali; padahal upami nuju nyalira kitu Sumbadra teh sok hahariringan; ari ieu simpe pisan; terus eta tilu emban teh pairing iring, lebet ka Taman Sari' barang jol kaget eta para embang ningal Sumbadra tos ngagoler di na jujukutan, bari katingal boloboran getih. Emaban nu panghereupna ngajerit terus kapaehan; ari nu kadua mah terus jejeritan; nu pangtukangna berebet ka luar ka Pos jaga, hariweusweus aya kacilakaan. Atuh si Kapala Jaga teu antaparah deui nakolan kohkol mani rame; kadenge ti luar ku saregu pasukan patroli atuh ger deui pada nakolan sakohkolna sakohkolna. Atuh ngan sakilat mani pinuh Kaputren ku Para Prajurit; sababaraha pajurit enggal naraek kuda; aya nu ka Amarta; ka sawojajar, ka Jodipati, kitu deui ka Meralaya. Nu nuju ka Meralaya, ditengah jalan dipegat ku jalama gagah, jangkung badag, sembada ngandung komara, Atuh si prajurit enggal eureun heula terus nyembah "Duh, ieu abdi nyanggakeun sinembah mugia katampi; duh abdi bungah pisan, wireh tiasa ditepangkeun sareng Raden." "Hemmmm.............   katampa ku Kaula, ieu aya naon siga rurusuhan kitu? Cik Kula bere warta?" "Duh Raden, Raden Gatotkacha; ayeuna Madukara nuju aya dina duka; Sang Sudewi cilaka; aya nu ngarogahala!" "Naon !???............. Gatotkacha ngabentak, ku kacida kaget sareng cangcayana, ka na eta warta. Si prajurit ampir wae tiguling ti na kudana ku reuwas2na. "Duuuh........... eu eu  eu...........  mugia Raden nyariosna rada kendor raden....... hu  hu  hu   ." Si Prajurit nirisan; soak ku soanten Gatotkacha nu sakitu handaruanana. "Sing bener anjeun ngomong, prajurit ! lamun masih hayang keneh panjang umur." "Aduh...........  naon nu ku kuring disebatkeun eta leres pisan Raden, mangga we tingali Ka Madukara; sareng sim kuring punten ayeuna rek ka Meralaya masihan warta. "Jung atuh ! sing gura giru !" Ti dinya Gatotkaca lumpat mani ngan sakilat tos dugi ka Madukara; barang dugi ti katebihan katingal jalmi2 siga nu saribuk pisan. Gatotkacha bingung oge, mun bibi aya nu ngarogahala di Tamansari pisan; aduh kuma asupna ? Kapan loba jelema; loba emban; loba prajurit nu jaga !? Piraku tolowedor mah!? Teras wae Gatot kacha lebet ka Karaton, teu aya nu nyegat, da memang Gatotkacha tos biasa lar bus di Madukara; lantaran anjeunna ditugaskeun jadi Panglima Mandala pikeun pager Indraprasta; nu matak Gatotkacha kacida reuwasna, naha aya bapa maling nu nyilwuri; teu kanyahoan ku anjeunna ! reuwas, isin, sareng sedih. Barang lebt ka Aula Karaton, paranti aya sidang katingal di tengah layon Dewi Sumbadra di na katil. di payuneunnana ngadeg bari lesu sareng sedih Arjuna; nu teras dihibur ku Dewi Drupadi sareng ingkang Raka Yudhistira. Bima dipengkereun Arjuna ngagerem kadya macan lapar; tetela amarah kapengkek, napsu kapegung tea. Tapi barang ningali Gatotkacha lebet; eta Bima ngan sakilat ngojengkang teras wae Gatotkacha dicerek bari sasauran heuras :"Eh Gatotkacha ! Naon gawe maneh hah !?" Teu acan ge Gatotkacha ngawaleran, geus jekok2 wae Gatotkacha ditampilingan ku Bimasena, bari lak lak dasar; pajarkeun Gatotkacha ngajagana sambewara, padahal geus dipercaya jadi Kapala atawa panglima Kaamanan sakuliah Indraprasta? Naha bisa kacolongan ?! Hartina kapan teu ngalaksanakeun tugas kalawan bener !? Nyata Gatotkacha urat kawat, balung besi teh lain bobohongan............... HANCA