Burisrawa kaedanan - 3

Ti bah AA

 

Barang Burisrawa emut ka na Purwadaksina; anjeuna kaget; lantaran duka kumaha carana, anjeuna tos aya di alun2 Kasatriayaan Madukara; Karaton mani caket pisan katingal sigrong. Wah geuning aing geus aya di Madukara? Padahal tadi mah kapan di leuweung gerot tempatna jin jeung siluman ? Wah enya bener sakti eta Ratu Siluman Gedeng Permoni teh. Kitu gerentes na Burisrawa waktos harita. Burisrawa lalaunan nyaketan ka karaton, bari culang cieung sieun aya nu nangenan; tapi sigana mah, teu aya nu ningal ka Burisrawa. Teras we maju nyaketan Karaton Madukara. Barang nuju keketeyepan kitu; katingal teu pati tebih pasukan nuju latihan; atuh enggal Burisrawa ngabalicet, nyumpit. Tapi sigana pasukan Madukara teh teu apal aya Burisriwa; saparantos pasukan tos ngaliwat; enggal Burisrawa kaluar deui' Burisrawa ayeuna mah ningal di Gerbang Karaton aya nu ngajaga 2 Prajurit bangun kaleker; ka beh jero oge aya Pos Kaamanan nu Piket aya 3 Tamtama; atuh Burisrawa rada ngaregog; Burisrawa emut yen anjeunna dipasihan jimat, nu mangrupa ali nu ayeuna nuju dianggo ku anjeunna. Naha ieu ali bisa ngajadikeun teu katingal, tawa henteu? Burisrawa teu acan yakin; enggalna bae Burisrawa keketeyepan nyaketan lawang saketeng; tapi kaciri dua prajurit nu ngajaga caricing we; teu apaleun aya nu ngadeukeutan ka lawang saketeng. Burisrawa bungah pisan; ah meureun enya aing bisa ngaleungit yeuh, Burisrawa nyaur salebeting galih, tapi keun rek leuwih diyakinkeun heula. Teras we Burisrawa langkung nyaketan ka Prajurit nu jaga; bari manggut sareng sura seuri. Tidituna mah ngajak someah ka nu ngajaga. Tapi eta nu ngajaraga; caricing we teu siga apal yen aya Burisrawa. Wah ieu para prajurit teh kacida disiplinna; saur Burisrawa di na manahna. Enggal wae langkung nyaketan deui; teras ngadeg payuneun eta dua prajurit. Keukeuh we teu aya reaksi sama sakali. Enya kituh aing teu kaciri ku nu sejen? Wah enyaan ieu jimat teh sakti. Gerentes Sang Burisrawa. Lalaunan Burisrawa asup lawang saketeng diantara dua penjaga; aneh eta dua prajurit teh teu ngalieuk2 acan. Burisrawa teras nyaketan POS jaga; tetep we para tamtama nu di Pos ge teu aya reaksina; padahal nu hiji siga nu melong Ka anjeunna; tapi pelongna pelong kosong; teu soga awas. Ah enya aing teu kaciri ku jalma sejen. Hahahaha, ayeuna aing rek gancang ka Kaputren; rek nempo pujaan aing; kabogoh aing. NYa eta Subadra. Hehehehe sugan we manehna keur mandi? Kitu gerentes hatena Burisrawa. Atuh barang ngabayangkeun Sumbadra nuju cebor; raray Burisrawa rada semu oranye. HANCA