[kisunda] Gatotkacha ka-8

 

Rama Bima, sareng Rama Paman Arjuna, kumaha yeuh? Bima ngagerem:"Geus lesotkeun Gatot, manehna geus meta ampun." Arjuna oge sasauran:"Enya bener Gatotkacha sok leupaskeun." Barang dileupaskeun Citrasena cedok we nyembah, teras nyarita:" Duuuh, kakara Kula meunang lawan anu sakitu jagona; Kaula taluk pisan. Engke upama anjeun perang jeung sing saha wae, tangtu Kaula bakal ngabantu andika. Tah ayeuna Kaula rek indit neangan tempat sejen, sabab tempat nu ayeuna geus diraruksak ku Kurawa. Soal tawanan Kaula. Kaula masrahkeun ka sampeyan." Nya der wae atuh, nu tiluan muka borogod Suyudhana, Karna sareng Kurawa sejenna. Barang dibuka Suyudhana culang cileung, ret kana pedang nu ngagoler di dinya teu antaparah deui anjeunna nyandak pedang teras bade ditigaskeun ka na beuheung anjeunna pisan, untung Karna rikat ngahalangan, jol deui Sakuni sareng Dursasana milu ngaronom sareng Meper Suyudhana. Akhirna Suyudhana kapiuhan. ( api2 sugan ku sabab era ku Pandawa ). Sakuni sanggeus basa basi ka Bima jeung Arjuna, ting laleos we ngabengbeos, era parada, Saparantos para Kurawa tebih Bima ngagerem:"Api2 siah..........jor marantog! awas wani balik deui ka dieu!" Arjuna mung gumujeng, kapiasem ku Ingkang Raka Bima. Enjingna saparantos papada istirahat, sadaya ngadep ka Yudistira; teras Yudhistira ngandika:"Bagja kumayangan, kasep Gatotkacha, hidep geus nuntaskeun tugas kalawan beres. Ua bungah kacida." "Nun inggih, Rama Ua, naon wae parentah ti Rama Ua, bade diestokeun pisan ku Putra; bujeng2 tarung jeung Bangsa Citrasena; dalah kedah lebet ka na lautan seuneu hurung; atanapi ka na elak2an naga, tangtos ku Putra dilaksanakeun." "Aduh bagja temenan Kaula boga anak saperti sampeyan." "Hahahaha, memang Gatotkacha pantes pisan jadi anak Kaula!"saur Bima bari reueus. "Eh Gatot..........  lain maneh teh hayang diajar panah ka KI Arjuna ? Jung ayeuna geus waktuna !" Atuh der we Gatotkacha ti harita jadi murid Arjuna. Memang calakan pisan ieu Gatotkacha teh; teu dugi ka mulan malen tos tiasa nyerep elmu panahna Arjuna. Malahan ditambih ku Elmu Gaib ti ibuna; Gatotkacha tiasa ngaluarkeun panah tina bahamna. Atuh kalintang bingahna para Pandawa ningal kasakten Gatotkacha. Sadaya reugreug manah, kagungan Pahlawan Sakti samodel Gatotkacha. TAMAT

__,_._,___