Samemeh Bharata Yudha ka-4

Barang Drestarastra nuju guntreng kitu, Sakuni lebet bari mamandapa, cong Nyembah, enggalna matur:"Duh Gusti Prabu, Kakang Drestarastra, sesembahan abdi Gusti, neda sih haksama, sim abdi ayeuna ngadep, ku margi ieu penting pisan, Kakang Prabu." Drestarata ngandika:"Eu, aya naon Sakuni ? Kapan Kaula teh kakara reureuh, ayeuna sampeyan datang deui, naha teu cukup tadi ?" Sakuni :"Mugia Kaka Prabu wening galih, kersa nampi ka abdi, nu bade usul, kanggo kasaean sadaya, mugia Kakang Prabu kersa nampi." Drestarastra:"Ari enya mah penting pisan, pok omongkeun, naon................" Sakuni:"Dawuh Gusti.........., bawiraos rai Gusti mah nu laip, memang Pandawa teh boga hak ka na nyepeng Indraprasta ( satengah Astina ) ." Drestarastra :"Kumaha ? Sampeyan mah teu puguh Rayo Sakuni............. tadi waktu sidang nyalahkeun Pandawa, ayeuna rek usul naon? cik sugan bisa mereskeun sakabeh pasualan." Sakuni:" Pandawa teh, kapan Putra Kakang Prabu oge sanes ?" "Enya, bener kitu pisan. Kaula nyaahna ka Putra2 Rayi Pandu, sarua jeung nyaahna Kaula ka Suyudhana, jadi Kaula embung aya salah sahiji pihak oge anu dirugikeun. Cik kumaha saran andika? Pok gancang, Kaula teu sbar hayang ngadenge."Kitu timbalan Sang Prabu Drestarastra. "Pandawa teh urang ulem we, sina kadieu, tah upami Duryodhana ngamuk, nya kapaksa urang korbankeun." Kitu saur Sakuni. Kaget mirenga ngadangu, sang Drestarastra, katon. "Eeh, enya ari adil na mah adil, tapi kumaha eta si Duryodhana ? Kaula mah nyaah sanget ka manehna teh. Kaula mah hayang caina herang , laukna beunang." Sabot nuju imbal wacana kitu, lumebet Sang Jakapitana ya Suyudhana; enggal nyembah sungkem ka ingkang Rama, sareng Ingkag Ibu; saparantos ditampi enggal Jakapitana matur :"Duh Rama Prabu, sesembaheun sadaya, ieu abdi Suyudhana, Putra sampeyan nu sok wangkelang, nyanggakeun badan sakujur ka Rama; mangga Rama Prabu abdi telasan, ayeuna keneh; abdi ihlas, moal bade panasaran." "Ke ke ke, Duryodhana, aya naon ieu teh ? Teu gugur teu angin, ujug2 menta ditelasan; naha hidep cangcaya ka na kanyaah ama? Yeuh kajeun ditukeur nyawa ama keur nebus sampeyan, ti batan sampeyan cilaka. Tong cangcaya, tinangtu Ama moal wani mergasa sampeyan." Dewi Gandari ngiring nyarios:"Kunaon hidep teh atuh, Duryodhana ? Teu puguh2 menta ditelasan? Aya naon? Cing pek nyarita bruk brak, kapan unggal2 menta naon oge tara teu ditedunan, sok nyarita." "Duh Kangjeng Rama, Duh kangjeng Ibu, Putra teh asa teu betah hirup di dunya teh, lantaran loba dosa; utamana ka Pandawa; hayang Putra menta dihampura, ti na rumasa geus nganyenyeri." Bingah amarwata suta, bingahna kagiri giri. Prabu Drestarastra sareng Dewi Gandari kalintang bingahna, barang mireng eta catiosan Sang Putra pangbarep. Emh bagja temenan mun anak Kaula bisa sadar? "Oh, anaking anak ama, Duryodhana, jadi kumaha kahayang sampeyan ayeuna ?" "Teu aya deui iwal ti hoyong nyembah menta dihampura ka Pandawa, utamana ka Yudhistira." "Emh alus tah patekadan hidep teh, Jakapitana? Terus kumaha ?" "Ulem Pandawa sina kadieu, teras pasihkeun Indraprasta ka Yudhistira, Rama kedah ngaihlaskeun Kaula rek leuleuweungan, mayar hutang." "Ke ke ke, palebah dieu mah, ama teu satuju. Keun we da Pandawa oge moal hayangeun males Pati. Sok we pasrahkeun Indraprasta , da kapan Astina skieu legana?  Moal moal kudu sampeyan leuleuweungan." Segruk we Duryodhana nangis, atuh enggal diusapan ku Prabu Dreastarastra sareng Gandari. Tos tos kulup Duryodhana, tos. "Emh ama, Kaula teh nyata jelema durjana loba pisan nyilakakeun ka Pandawa." "Keun we nu penting mah, ayeuna hidep geus sadar." "salian ti eta, Rama Prabu, mugia janteng uninga; kapan kapungkur mah Indraprasta teh Nagari leutik; tah salami 13 taun teh Putra sadaya naluk2keun nagara disalurilingna keur nguatan Indraprasta. Utamana Raja Angga Karna. Da tara eleh Raja Angga mah jeung sasaha oge. Tah jadi Indraprasta nu mana nu kudu dibikeun teh atuh ?" "NYa atuh sagemblengna we, da meureun milikna eta teh."saur Dresta rastra. "Upami kitu mah atuh Rama Prabu teu Adil ngahukuman ? Kapan Sabda Pandita Ratu, Raja teh kudu ngalakukeun Kaadilan.Engke adi2 nu sanes panginten baruntak ? ari Kaula sorangan ihlas masrahkeun ?" "Kumaha atuh, nurutkeun pikiran hidep, Duryodhana ?" "Cek Putra mah, hiji2na jalan nya eta ama nelasan Putra." "Ah! Kadinya deui kadinya deui. Ulah, ulah kitu, Duryodhana." "Pikiran Putra kieu, lamun urang masihkeun Indraprasta ka Pandawa, leres adil kanggo Pandawa; tapi aya nu rada sesah, nya eta: kahiji bagean mana Indraprsta nu hak Pandawa teh? Da tos robah jadi lega pisan ayeuna teh. Meureun moal daekeun Pandawa dibere nagari anu dilingkung ku nagri nu taluk ka Astina ? Mun kabeh dibikeun kapan eta teh sami wae sareng teu ngahargaan para Pahlawan? Utamana Karna. Pasti maranehna nyarerieun hatena, meunang hese cape, ayeuna dirampas ku Pandawa. Pasti ieu bakal jadi biit pacengkadan nu moal aya tungtungna.Memang dihiji hal urang adil ka Pandawa; tapi disisi lain, jadina teu adil ka Para Putra Kurawa. Kumaha tah ama ?" Leng leng ramyaning kang sasangka................ Drestarastra nyaur salebeting penggalih:"Eeh, ari di na biwir, anak Kula teh rek mikeun ka Pandawa; tapi saenyana mah moal dibikeun. Tapi ana dipikir, memang logis oge eta omonganana teh?Kumaha nya sikep Kula? Da Kaula mah kahayang teh, anak aing maju, anak Pandu oge mulya. Tapi sigana hese." Saparantos lami mindel enggalna Drestarastra sasauran:"Anaking, anak ama, Duryodhana. Saenyana mah salian ti mikirkeun kaadilan, ama teh hawatir pisan, lamun teu dibikeun tea mah, tangtu Pandawa bakal ngamuk. Bakal ngamusuh ka urang. Pan hidep nyaho sorangan kumaha saktina Arjuna? Kumaha Gagahna Bhima? Jeung kumaha pinterna maen pedang Nakula Sadewa? Tah ama mah sok inggis anak2 ama engke cilaka. Jadi ku pikiran ama mah, maning ge Indraprasta teh dibalikeun deui ka Pandawa." "leres pangandika Rama Prabu. Tapi keukeuh moal adil ka nu sanesna deui. sarengna deui abdi sadaya teu sieun mayunan Pandawa. Malahan mah, Pandawa nu gimir ku urang. Rama Prabu. Tah di na masalah ieu, Paman Sakuni langkung apal." "Kumaha Sakuni?" Drestarastra naros ka Sakuni. "Oooo kieu eta teh, Ka Prabu. Ari Pandawa teh terus terang we, ngan ukur ngandelkeun Arjuna hiji. Da ari Bhima mah ngan ukur GEDE tambuh. Teu aya kapinteranana, ngan pedah kuat wungkul; kuat dipanah , kuat digada. Tapi sanes teu teurak senjata. Jadi gampil lah, ngalawan Bhima mah. Atuh kentenan Nakula Sadewa mah, cek paribasa tong diitung itung acan. Yudhistira, atuh ngan ukur utuh etah, perangna mah can kaciri bisana. Jadi nya andelanana teh ukur Arjuna hiji. Kumaha ari Kurawa? Kapan aya Karna. Hiji Karna ge leuwih ti cukup keur nyanghareupan Arjuna. Komo deui atuh di Astina kapan aya Paman Bhisma, nu tara eleh perang? Ahlina perang sareng panah tos kasohor, disakuliah Hindustan. Teras deui Guruna Arjuna pisan, kapan Resi Drona. Arjuna tara mundur ku sasaha oge, tapi ari ka Resi Drona mah, eleh Arjuna teh. Sieuneun, moal wani2 acan perang !? Tambah deui ku Guru Para Senapati Astina, nya eta Krepa ! Tuh kapan 4 Arjuna lawan hiji Arjuna, tangtuna ge can perang tos ngeper tah, Pandawa teh. Teu acan pahlawan sejenna, model Aswatama." Hanca

__,_._,___