Burisrawa Kaedanan - 20

Caturkeun wae Para pasukan Madukara nu dipimpin ku Gatotkacha sareng Antareja tos ngadamel hiji pertahanan; tiap diserang ku para prajuit Wanamaya, eta Pasukan Madukara ngalawan kalawan disiplin; atuh kuat pisan barisan pertahanan lapis kahiji Madukara teh; ngan orokaya pasukan Maya Wana mah, bari waranian teh kaciri wareduk deuih; jadi masing acak acakan oge, lila2 mah Pasukan Madukara kadeseh; laju lapis kahiji diganti ku lapis ka dua nu kahiji mundur jadi pangtukangna; lapis katilu geus siap pikeun ngaganti lapis kadua. Ku cara gentenan kitu; teu wudu pasukan Madukara jadi bisa nahan oge desekan ti pasukan Mayawana, nepi ka perangna lami pisan. Gatotkacha lajeng wae luncat majeng kapayun, ngarontok hiji prajurit nu pangcaketna ka anjeunna. Barang dirontok barang beuheungna dipurilitkeun dugi ka pites pisan; atuh tiwas sapada harita; ngan aneh pisan wujud eta prajurit teh leungit gantina oray hideung nu sapat huluna. Antasena ge teu eleh geleng ku ingkang rayi, ngarontok terus miting hiji prajurit nepi ka maotna; aneh deui wae, prajurit musuh jadi hileud hideung nu gede, bari ngarengkol geus teu nyawaan. Saterasna ieu dua pahlawan Indraprasta ngaramuk; dugi ka ting galoler bangke oray hideung, hileud hideung; anjing hideung; babi hideung; kalajengking ; babakaur jeung sasatoan sejenna nu harideung warnana. Atuh ku ieu pangamukna Gatotkacha pasukan Madukara bari perang teh, bari salusurakan ku bingahna ningal ketak pamimpinna nu sakitu garagahna. Sabalikna pasukan Mayawana rada kadesek. "Eh ponggawa! Mangka waspada! Tong ngalawan prajurit yeuh wani mah lawanan Kaula Senapati Mayawana!" Eta nu susumbar teh nyatana si Setra Sakti. Nya atuh Gatotkacha enggal mayunan ieu senapati. Saperti nu tos badami si Ganda Sakti oge tos papayun payun sareng Antasena. Ger wae atuh ieu dua pasang Pahlawan teh perang ragot; para prajurit teras neraskeun peperanganana. Tapi pasukan Madukara beuki teteg hatena lantaran Pimpinan maranehna kacida garagahna; ayeuna maranehna nyobaan ari ngadek teh sok leuwih ti sakali; nyata ayeuna mah pasukan Maya Wana ting jarungkel ngajadi bangke orang hideung. Lamun dikadek ngan ukur sakali teu teurak; tapi dua kali di na tapak nu sarua eta prajurit teh langsung rarubuh. Atuh Pasukan Madukara beuki tambanh sumangetna. Patih Ganda Setra lajeng majeng kapayun ; ngamuk ka para prajurit Madukara; atuh sapada harita pasukan Madukara teh ting jarungkel; da nu ieu mah dikadek dua kali teu rengrot2 acan, bari jeung hese deuih keunana oge; da elmu mempona kacida mumpunina. Atuh pasukan Madukara ripuh, seueur nu tiwas; nya aya nu lumpat laporan ka Karaton Madukara.; barang eta prajurit laporan, teu ngantosan parentah atawa widi dwui gesit gesat gesut Sang Bimasena lumpat kaluar, nuju ka Medan Perang. "Yoooy, lamun anakna teu kuat aing bapana nu bakal ngabinasa eta urang Wanamaya. Mangka waspada!" Bima bari lumpat bari susumbar. Mung sakilat tos aya di medan jurit; teras wae megat Patih Ganda Setra nu nuju ngamuk. HANCA