Fiksimini - "Wrestling!"

Fikmin #Wrestling!#

"Si Hideung! Si Bujur Katél siah!" "Naon, Konar? Ngaca! Si beungeut Walanda siah!" "Hayang gelut sia téh?" "Sok! Aing gé wani!" Ger galungan. Siliséréd. Silitonjok. Habek! Si Hideung ditonjok angenna. Bangkieung! Jumarigjeug. Panon burahay nyiki saga. Kekerot. Renghap ranjug. Serenteng Si Konar narajang deui. Ger papuket. "Bener sia teh bosen hirup?" "Sugan, sia?" "Aing mah can kawin euy?" "Heueuh aing gé can ka haji!" "Kumaha atuh? Tuluykeun?" "Kudu dituluykeun! Bahaya! Ngan...!" Si Konar ngaharéwos. Silikiceupan. "Okéh!" Ger papuket deui. Habek! Habek! Tanding "wrestling". Gebru ngajurahroh. Ngadedempés, taya rénghapna. "Walah Sid paraéh euy! Mangkaning Si Kalung Hideung beunang hésé! Beunang ngala handapeun batu!" "Heueuh Si Kalung Konar gé beunang ti bera!" Si Osid jeung Si Sakim tingharuleng. Hanjelu. "Piceun euy, alungkeun kana baluntas!" Tinglaléos. Baralik ka tepas imahna. Sanggeus taya soara. "Krik-krik, krik-krik!" "Sessst, tong tarik teuing. Bisi kadéngéeun ku budak dugul!" "Enya atuh, yu ah néangan imah anyar! Bye!" "Bye!"

__._,_.___

,___