Fiksimini - Cucunguk

Fikmin #Cucunguk#
Ku Ki Hasan

Tirilik lumpat ka juru Lab. Diberik. Gep ditewak. Ditangkarakkeun luhureun meja. Roroesan. Cucunguk Oriental, teu sieuneun cahaya. Tahan uji, tahan cuaca. Sanggup nyusup liang pokek, ngulunu kanu hangru. Dikoeran congo pinset. Kulit soklat herang liat. Sret! Dibedel. Dibebesan. Dikaput deui. Matana molotot, hurung. Sup kana kotak kaca.

Laptop dibebeskeun. Kamera direngkolkeun. Ransel disorendang. Target ditangtukeun. Anjog ka buruan gedong Dewan. Kotak dibuka. Roroesan. "Jig susud! Ku aing ditungguan peuntaseun!" Gek di juru cafe. Gap kana headset. "Sok maju ka lawang! Tong ka tengah! Mipir ka sisi! Awas CCTV! Ngenca! Tuh milu kana lift! Ngatuhu! Tungguan panto kadua! Tuh nyempod na suku meja! Buka mata jeung ceuli!"

Bray laptop hurung. Jandela recorder muka. Sinyalna reup bray. Turun naek. Eces nu keur transaksi. Klik direkam. Geleser CD haneut anyar meuleum kaluar. Kirimkeuneun ka KPK. "Tugas geus rengse! Wayahna! Harakiri!" Awakna ngeprul jadi lebu. 

JB, 13/03/2012

__._,_.___